အိပ်စက်ဖို့နဲ့ နိုးထဖို့ အကောင်းဆုံးအချိန်များ
တစ်ရက်ညအိပ်ချိန်ကို ၇ နာရီကနေ ၈ နာရီကြား အနည်းဆုံးရှိရမယ်ဆိုတာ လူတော်တော်များများက သိပြီးသားဖြစ်ပေမယ့် ဘယ်အချိန်မှာ အိပ်ပြီး၊ ဘယ်အချိန်မှာ ထသင့်လဲဆိုတာကိုတော့ မေ့နေတတ်ကြပါတယ်။ ကိုယ့်ရဲ့တစ်နေ့တာအိပ်စက်ချိန်နဲ့ နိုးထချိန်ကို ပုံသေထားထားခြင်းက ခန္ဓာကိုယ်က အိပ်စက်မှုအချိန်ဇယားနဲ့ ရင်းနှီးကျွမ်းဝင်မှုရှိစေသလို၊ ဒီအချိန်ရောက်ပြီဆိုတာနဲ့ အိပ်သင့်ပြီဆိုတာကို ဦးနှောက်နဲ့ ကိုယ်တွင်းအင်္ဂါတွေက သေချာအချက်ပြပေးနိုင်ပါတယ်။
အိပ်စက်ဖို့အချိန်နဲ့ နိုးထဖို့အချိန်ကို ဘယ်လိုတွက်မလဲ။
ကိုယ့်ရဲ့အသက်အရွယ်အလိုက် တစ်နေ့တာရှိသင့်တဲ့ အိပ်စက်ချိန်ပေါ်မူတည်ပြီး သေချာတွက်သင့်ပါတယ်။
အသက် ၀ - ၃ လအတွင်း = ၁၄ - ၁၇ နာရီ
အသက် ၄ - ၁၂ လအတွင်း = ၁၂ - ၁၆ နာရီ
အသက် ၁ - ၂ နှစ်အတွင်း = ၁၁ - ၁၄ နာရီ
အသက် ၃ - ၅ နှစ်အတွင်း = ၁၀ - ၁၃ နာရီ
အသက် ၉ - ၁၂ နှစ်အတွင်း = ၉ - ၁၂ နာရီ
အသက် ၁၃ - ၁၈ နှစ်အတွင်း = ၈ - ၁၀ နာရီ
အသက် ၁၈ - ၆၀ နှစ်အတွင်း = အနည်းဆုံး ညအိပ်ချိန် ၇ နာရီ
အသက် ၆၁ - ၆၄ နှစ်အတွင်း = အနည်းဆုံး ညအိပ်ချိန် ၇ - ၉ နာရီ
အသက် ၆၅ နှစ်နဲ့အထက် = အနည်းဆုံး ညအိပ်ချိန် ၇ - ၈ နာရီ
ဒီအတွက် ကိုယ့်ရဲ့ညအိပ်ချိန်ဟာ ကိုယ့်အသက်အရွယ်အလိုက် တစ်နေ့တာလိုအပ်တဲ့ အိပ်ချိန်ပေါ် မူတည်ပြီး တွက်သင့်ပါတယ်။ ဥပမာ ယေဘုယျအနေနဲ့
၁။ တစ်ရက်ကို ညအိပ်ချိန် ၇ နာရီရှိရမယ့်သူတွေက ည ၁၀ နာရီ အိပ်မယ်ဆိုရင် မနက်ကို ၅ - ၆ နာရီကြား ထပေးပါ။
၂။ အကယ်လို့ ကိုယ်က မနက်ပိုင်းအစောကြီး အပြင်သွားစရာရှိလို့ မနက် (၆) နာရီ ထရမယ်ဆိုရင် ညဘက်ကို ၁၁ နာရီထက် နောက်ကျပြီး မအိပ်ပါနဲ့။
အကောင်းဆုံးကတော့ ညဘက်ကို (၁၁) နာရီထက် နောက်ကျပြီးမအိပ်ဖို့နဲ့ အလွန်အရေးကြီးပါတယ်။ ဘာကြောင့်လဲဆိုတော့ ညအိပ်ချိန်မှာ ခန္ဓာကိုယ်ထဲမှာရှိတဲ့ ကိုယ်တွင်းအင်္ဂါတွေက အနားယူရမှာဖြစ်ပြီး တစ်နေ့တာအတွင်း ပျက်စီးသွားတဲ့ ဆဲလ်တွေ၊ တစ်ရှူးတွေ၊ ကြွက်သားနဲ့ ထိခိုက်နာကျင်မှုတွေကို ပြန်ကုစားဖို့ ခန္ဓာကိုယ်က အလုပ်လုပ်ရပါတယ်။ ဒီအတွက် ညဘက်ကို စောစောအိပ်စက်အနားယူခြင်းက ကိုယ့်ခန္ဓာကိုယ်ကို ကျန်းမာကြံ့ခိုင်စေဖို့ ကူညီရာရောက်ပါတယ်။ မနက်ဘက်ကို စောစောထခြင်း၊ မထခြင်းက ကိုယ့်ရဲ့ အယူအဆနဲ့ ကိုယ်ဘယ်လောက်ထိ အိပ်စက်မှာလဲပေါ် မူတည်ပြီး တွက်ဆနိုင်ပါတယ်။
အဓိကက မနက်ဘက်ကို စောစောထဖို့ထက်စာရင် ညဘက်ကို စောစောအိပ်စက်အနားယူဖို့၊ ကိုယ့်တစ်နေ့တာ သတ်မှတ်ထားတဲ့ အနည်းဆုံးညအိပ်ချိန်ထက် မနည်းဖို့ကို သေချာဂရုစိုက်ပေးပါ။ ကိုယ့်ရဲ့တစ်နေ့တာ ညအိပ်ချိန်၊ မနက်နိုးထချိန် ပုံသေသတ်မှတ်ထားနိုင်ရင်တော့ အကောင်းဆုံးပါပဲ။ ကိုယ်ဟာ ညအိပ်ချိန်ကို သေချာဂရုစိုက်ပေးမယ်ဆိုရင် နေ့လယ်နေ့ခင်းမှာ အိပ်ချင်စိတ်မဖြစ်အောင်၊ တစ်ရေးမှေးစရာမလိုဘဲ လန်းဆန်းတက်ကြွနေစေမှာပါ။ နေ့လယ်နေ့ခင်းတစ်ရေးအိပ်ခြင်းကို တစ်နေ့တာ ညအိပ်ချိန်မှာ ထည့်မတွက်တာကြောင့် ခဏတာအနားရစေတာကလွဲရင် ကိုယ့်ကျန်းမာရေးအတွက် ထူးခြားစေတာမျိုး မရှိပါဘူး။
အကယ်လို့ အသက်အရွယ်အလိုက် တစ်နေ့တာလိုအပ်တဲ့ အနည်းဆုံးညအိပ်ချိန်ကို မရဘူးဆိုရင်
· နုန်းချိပင်ပန်းပြီး အားမရှိသလို ခံစားရခြင်း
· တွေးခေါ်နိုင်စွမ်းနဲ့ မှတ်ဉာဏ်ထိခိုက်ခြင်း
· စိတ်ထဲ နေထိုင်မကောင်းသလို ခံစားရခြင်း
· အိပ်ချင်စိတ်ဖြစ်လာခြင်း
· အသက်ရှူနှုန်း၊ နှလုံးခုန်နှုန်း မမှန်ခြင်း
· ခေါင်းမူးခေါင်းကိုက်ဖြစ်ခြင်း
· ခံတွင်းပျက်ခြင်း
· လေ့ကျင့်ခန်း၊ အားကစားကို ကောင်းကောင်းမလုပ်နိုင်ခြင်း
· တီထွင်ဖန်တီးနိုင်စွမ်း ကျဆင်းခြင်း စတဲ့ ဘေးထွက်ဆိုးကျိုးတွေ ဖြစ်လာနိုင်ပါတယ်။
ဒါကြောင့် ညဘက်ကို တတ်နိုင်သလောက် စောစောအိပ်ပါ။ မနက်ကို စောထဖို့ထက် အိပ်ရေးဝအောင် အိပ်ဖို့ ဂရုစိုက်ပေးပါ။ အိပ်ချိန်ကို ပုံသေအတိုင်း သတ်မှတ်ပြီး ကောင်းစွာအိပ်စက်အနားယူပေးပါ။
ရေးသားသူ - ရဲမျိုးမြတ်